ဒီရင်နားပါအရိုင်းလိပ်ပြာ..(၇)

----------------------------------------
တောနက်လာတာနဲ့အမျှသစ်ပင်ကြီးတွေများပြီးနေရောင်ခြည်ကျရောက်တာနည်းလာသည်..လေထုကလည်းပိုပြီးအေးစိမ့်လာသည်..စမ်းထွက်ပေါက်တခုနဲ့မနီးမဝေးမှာစခန်းချသည်..ဒီတခါတော့ညနေမစောင်းခင်မုဆိုးနှစ်ယောက်အလုပ်ရှုပ်နေကြသည်..၀ါးတွေကိုရသလောက်ခုတ်ပြီးစုစည်းနေတာကြောင့်ဘာလုပ်မလို့လဲမေးတော့လင့်စင်ဆောက်မလို့တဲ့..ရွက်ဖျင်တဲတွေပါသားဘဲလို့ပြောတော့တောနက်လာတာရယ်စမ်းထွက်ပေါက်နဲ့နီးတာရယ်ကြောင့်သစ်ပင်ပေါ်အိပ်တာစိတ်ပိုချရသည်ပြောတာကြောင့်ကျနော်လည်းဂျာမန်ကြီးတွေကိုဘာသာပြန်ပြီးပြောပြလိုက်သည်..

အနောက်နိုင်ငံသားတွေ၏ချစ်စရာကောင်းမှုမှာအကျိုးအကြောင်းခိုင်လုံလျှင်စောဒကမတက်ဘဲအေးအေးဆေးဆေးလိုက်နာသည်..သူတို့ပါဝါးတွေဝိုင်းကူသယ်ပေးတော့အလုပ်ပိုတွင်သည်..ကိုရှမ်းကြီးကတော့ထမင်းချက်ပြီးတခြားရှာမနေတော့ဘဲအသားဘူးဖောက်ဘဲလုပ်ပေးသည်..ပြီးတော့မုဆိုးနှစ်ယောက်လင့်စင်ထိုးနေရာမှာသွားဝိုင်းကူပေးနေသည်..လင့်စင်ကိုသစ်ပင်ပေါ်မှာအရမ်းကျယ်ကျယ်ထိုးမရတာကြောင့်သစ်ပင်နှစ်ပင်ပေါ်နှစ်ခုထိုးရသည်..ကြိုးကလည်းဝေးဝေးမရှာရ..၀ါးကိုဘဲနှီးဖြာပြီးလိမ်ကျစ်တုပ်ကြသည်..

ရှမ်းတွေ၏ဓါးမသည်ဘက်စုံတော်တော်အသုံးဝင်တာတွေ့နေရတာကြောင့်ကျနော်တော်တော်သဘောကျလာသည်..ရန်ကုန်အပြန်တော့ရှမ်းဓါးတလက်သယ်ဦးမည်..လင့်စင်တွေထိုးပြီးတော့မှောင်ရီပျိုးနေပြီ..မုဆိုးများကထမင်းစောစောစားကြရန်နှင့်အပေါ့အပါးကိစ္စကိုတတ်နိုင်သလောက်ဖြေရှင်းထားဖို့မှာသည်..ပစ္စည်းများကိုပလိုင်းထဲစုထဲ့ပြီးသစ်ပင်ပေါ်မှာကြိုးနဲ့ကပ်ချည်ထားလိုက်သည်..မီးပုံတွေဖိုထားသည့်ထဲထင်းခြောက်တုံးများထဲ့ပြီးတော့မုဆိုးနှစ်ယောက်ကလင့်စင်တခုဆီမှာတယောက်စီနေသည်..

ဆရာနဲ့ဂျာမန်နှစ်ယောက်ကတဖက်..ကျနော်နဲ့ဂျာမန်တယောက်ရယ်၊ကိုရှမ်းကြီးရယ်ကတဖက်လင့်စင်ခွဲတက်ကြသည်..ကျနော်တို့အပေါ်ရောက်တော့မတော်တဆအပေါ့သွားချင်ရင်ရအောင်ဝါးဆစ်ပိုင်းများကိုမုဆိုးတွေတင်ထားတာတွေ့လိုက်ရသည်..တောထဲမှာထိုးသောလင့်စင်ပေမယ့်အတော်ကိုခိုင်ခိုင်ခန့်ခန့်လုပ်နိုင်တာတော့ချီးကျုးစရာဖြစ်သည်..ကျနော်တို့တက်ပြီးတာနဲ့မုဆိုးကအဖြစ်လုပ်ထားသောဝါးလှေကားကိုအပေါ်သို့ဆွဲတင်ပြီးသစ်ပင်မှာကပ်ချည်ထားလိုက်တော့သည်..

လင့်စင်ကမြေပြင်နှင့်(၁၅)ပေခန့်သာမြင့်တာကြောင့်သိပ်အမြင့်ကြီးတော့မဟုတ်..မြေပြင်ကိုရှင်းရှင်းလင်းလင်းမြင်နေရသည်..မီးပုံကလည်းတောက်လောင်နေတာကြောင့်သိပ်အေးသည်ဟုမထင်ရ..ကျနော်တို့လည်းပါလာသောခြင်မကိုက်သည့်လူးဆေးလေးတွေကိုယ်စီလူးလိုက်သည်..တောနက်တာမို့ညမှောင်တာမြန်လှသည်..အောက်ကမီးပုံအရောင်ကြောင့်သာလင့်စင်ပေါ်တွင်မှုန်ဝါးဝါးအလင်းရောင်လေးတော့ရှိနေသည်..

လင့်စင်ကလူလေးယောက်ငါးသေတ္တာထဲထဲ့သလိုညီညီစီအိပ်ရင်တောင်ဂျာမန်ကြီးဆိုခြေထောက်ထွက်နိုင်နေတာကြောင့်ကျနော်လည်းမုဆိုးနည်းတူသစ်ပင်ကိုမှီထိုင်ကာအိပ်ငိုက်နေတော့သည်..ညဉ့်နက်လာတာနဲ့အမျှစမ်းပေါက်ဆီရေလာသောက်သောသားကောင်ငယ်တို့တောတိုးသံတချို့ကိုသဲ့သဲ့ကြားနေရသည်..ပိုးကောင်တို့၏တစီစီအော်သံတို့ကလည်းနေရာအနှံ့မှပေါ်ထွက်နေသည်..ထိုစဉ်ရုတ်တရက်လေမတိုက်ဘဲလေတိုးသံကြီးတဝေါဝေါဆူညံသွားသည်..ဘေးဘီလှည့်ကြည့်တော့သစ်ရွက်တောင်မလှုပ်..

လေတိုက်သံအပြီးတောကြီးတခုလုံးဆိတ်ငြိမ်ကျသွားသည်..ညဥ့်ပိုးကောင်တို့၏အော်သံတွေလည်းမကြားရတော့..လေးလံသည့်အမှောင်ထုကြီးတခုသိပ်သည်းပြီးကျလာသလိုထင်ရသည်..တိတ်ဆိတ်မှုကသည်းမခံနိုင်စရာ..ထူးခြားသည့်အခြေအနေမို့လှဲအိပ်နေသောဂျာမန်ကြီးပါထထိုင်လာသည်..မီးပုံကလည်းမီးညွှန့်ကျိုးပြီးသိပ်မလင်းတော့..ထိုအချိန်တွင်ကျနော်တို့စခန်းချရာနေရာဆီသို့လျှောက်လာသောတောတိုးသံကိုကြားလိုက်ရသည်..မှိန်ပြပြမီးရောင်အောက်သို့ရှမ်းအဖိုးကြီးနဲ့အမယ်ကြီးတို့နှစ်ယောက်တုန်တုန်ခိုက်ခိုက်ဝင်လာပြီးကျနော်တို့လင့်စင်တွေရှိရာသစ်ပင်တွေကိုမော့ကြည့်သည်..

အဖိုးကြီးနဲ့အမယ်ကြီးရဲ့မျက်နှာကသနားစဖွယ်အကူအညီတောင်းနေသလိုမို့ကျနော်လည်းဘာလုပ်ပေးရင်ကောင်မလဲစဉ်းစားနေသည်..ဂျာမန်ကြီးကတော့အနောက်နိုင်ငံသားပီပီဒုက္ခရောက်လာသူကိုဆင်းကူဖို့ပြောလာသည်..မုဆိုးကကျနော့်ကို..
-
ခင်ဗျားလူကိုထိန်းလိုက်ဦး..ဒါတောခြောက်တာဗျ..ဒီတောနက်ထဲဘယ်ကအဖိုးကြီးအဖွားကြီးရှိမလဲ..
-
ဟိုဘက်လင့်စင်မှာလည်းအလားတူမုဆိုးကထိန်းနေပုံရပါသည်..ကျနော့်ဘေးကမုဆိုးကစိတ်မရှည်ပုံနှင့်လက်ထဲကဒူးလေးကိုကိုင်ပြီးမြှားထဲ့ကာအမယ်ကြီးကိုချိန်လိုက်တာကြောင့်ဂျာမန်ကြီးကလှမ်းဆွဲပြီးတားတော့သည်..မြှားကလှမ်းဆွဲသည့်အရှိန်ကြောင့်လမ်းချော်ပြီးမြေပြင်ကိုသွားစိုက်သည်..အံ့သြစရာကောင်းသည်ကတော့အဖိုးကြီးနဲ့အမယ်ကြီးတို့နှစ်ယောက်ရုတ်တရက်နောက်ဂျွမ်းပစ်ပြီးတောထဲပြန်ပြေးဝင်သွားသည်..ကျနော်တို့ထိုင်နေသောသစ်ပင်ကြီးလည်းတစုံတခုကတိုက်မိသလိုသိမ့်ကနည်းလှုပ်သွားသည်..

ခဏအကြာတွင်တောသည်ပြန်လည်သက်ဝင်လာတော့သည်..နဂိုအတိုင်းညဥ့်ပိုးကောင်တို့အော်သံတွေကိုလည်းပြန်ကြားလာရသည်..ကျနော်လည်းသစ်ပင်မှီရင်းအိပ်ပျော်သွားတော့သည်..လင့်စင်လှုပ်သွားမှမနက်မိုးလင်းလို့မုဆိုးနဲ့ကိုရှမ်းကြီးအောက်ကိုဆင်းဖို့ပြင်နေတာတွေ့တာကြောင့်ကျနော်လည်းအောက်ကိုလိုက်ဆင်းခဲ့သည်..ညကအဖိုးကြီးနှင့်အမယ်ကြီးရပ်နေသောနေရာကိုသွားကြည့်တော့လူခြေရာမတွေ့ဘဲတောကောင်ခြေရာတို့ကိုသာတွေ့လိုက်ရသည်..
------------------------------------By KK
ဆက်ရန်

 —

Posted in: Stories, ဒီရင်နားပါအရိုင်းလိပ်ပြာ