ဒီရင်နားပါအရိုင်းလိပ်ပြာ..(၄)

----------------------------------------
လွိုင်လင်မှမိုင်းပျဉ်းဘက်ထိသွားရသောခရီးရှည်ကြီးကြားထဲကရှမ်းရွာလေးဆီမောင်းလာခဲ့ကြသည်..လမ်းခရီးကသစ်ရိပ်ဝါးရိပ်တို့ဖြင့်အုံ့အုံ့မှိုင်းမှိုင်း..အဝေးကတောင်ပြာတန်းနဲ့မောင်းနေသောတောင်ပေါ်လမ်း..တောင်တွေကနီးလာလိုက်ဝေးသွားလိုက်..ကားပေါ်ကလှမ်းကြည့်တော့ကိုယ်လာခဲ့သည့်တောင်ပေါ်လမ်းကောက်ကောက်ကွေ့ကွေ့များကိုပြန်မြင်နေရသည်..တဖက်ကတောင်ကမ်းပါးနဲ့တဖက်ကတောင်ချောက်တို့အကြားကားလမ်းကွေ့တွေကရှေ့ကိုကြိုမမြင်နိုင်တာမို့ဟွန်းတီးသံကြိုပေးနေရသည်..

ကားလမ်းဘေးတောင်ကမ်းပါးများပေါ်မှာမိုးရာသီရေတိုက်စားထားသောရေစီးကြောင်းရာများ..တောင်ပေါ်ရေထွက်တွေကစိမ့်စမ်းရေကစီးထွက်နေတာတွေလည်းရှိသည်..တနေရာမှာဆိုတောင်ပေါ်စမ်းပေါက်ကရေတို့ကတဝေါဝေါစီးလာပြီးကားလမ်းကိုဖြတ်ကာတောင်အောက်ဘက်သို့ရေတံခွန်သေးသေးလေးလိုဆက်စီးကျနေတာတွေ့ရသည်..နွေရာသီမို့အလှအပတခုလိုဖြစ်နေပေမယ့်မိုးရာသီဆိုအရှိန်ပါသည့်ရေတံခွန်ငယ်တခုလိုစီးလာနိုင်ပြီးတောင်ပြိုမှုတောင်ဖြစ်နိုင်သည်..

နွေရာသီမို့လမ်းဘေးဝဲယာတောင်ချောက်နှင့်တောင်ကမ်းပါးတို့တွင်ခပ်စိတ်စိတ်ပေါက်နေသောသစ်ပင်ကြီးငယ်တို့မှတချို့ပန်းများခိုတွဲပွင့်နေကြသည်..ကားမှန်ဖွင့်ထားလိုက်တော့တောင်ပေါ်လေကအေးအေးမြမြလတ်လတ်ဆတ်ဆတ်..တခါတရံပန်းရနံ့လေးတွေတောင်သင်းထုံပြီးပါလာသေးသည်..တော်တော်ကြာကြာတောင်တက်လမ်းကိုကွေ့ဝိုက်မောင်းနှင်ပြီးကာမှဆရာတချိန်ကရောက်ခဲ့သောတောင်ပေါ်ရွာလေးသို့ရောက်သည်..အိမ်ခြေအနည်းငယ်သာရှိသောရွာကလေးသည်တောင်ခိုးတောင်ငွေ့များကြားအထီးကျန်နေသယောင်..

ဂျာမန်ကြီးသုံးယောက်ကိုရွာက ကလေးငယ်တို့ကပွဲတော်ကဲ့သို့ထွက်ကြည့်ကြသည်.. ရွာမုဆိုးအိမ်က တော်ရိလျော်ရိ.. ရေကတော့တောင်ပေါ်စမ်းထွက်တခုကနေ၀ါးတံလျှောက်များနှင့်အဆင့်ဆင့်သွယ်တန်းရယူထားကြသည်..ဆရာကအိမ်ရှေ့ခန်းတွင်မုဆိုးအလှထားထားသောငှက်ရုပ်ကိုဂျာမန်တွေကိုခေါ်ပြသည်..စိတ်ဝင်တစားကိုင်ကြည့်..သူတို့တွင်ပါသောမှတ်တမ်းများနဲ့တိုက်ဆိုင်စစ်ဆေးပြီးဒီငှက်မျိုးစိတ်မှတ်တမ်းမတွေ့သေးကြောင်း..တောထဲတွင်လိုက်ပြီးလေ့လာကြမည်ဆိုသည်..

ဆရာကရွာမုဆိုးကိုငှက်ရှိသည့်နေရာကိုသွားရောက်လေ့လာလိုကြောင်းပြောပြပါသည်..
-
အိုက်ပီးရေ..သူတို့ကမင်းငှက်တွေ့ခဲ့တဲ့နေရာကိုသွားကြည့်ချင်တယ်တဲ့..အဲ့ဒါမင်းလိုက်ပို့နိုင်မလား
-
လိုက်ပို့တာတော့ရတာပေါ့ဆရာလုံရယ်..ဒါပေမယ့်ဒီငှက်ကတောနက်ထဲမှာနေတာ..ငါကသူ့ကိုပစ်တာမဟုတ်ဘူး..သစ်ပင်ပေါ်ကမျောက်ကိုပစ်တာဟေ့..ငါ့ဒူးလေးချက်ကဘယ်လိုလွဲတယ်မသိ..အပေါ်မှာပျံလာတဲ့ဒီကောင့်ကိုတဲ့တဲ့ပိတ်မှန်တာကွယ်..
-
ဒါဆိုမင်းမျောက်ပစ်တဲ့နေရာနဲ့တော့သိပ်မဝေးလောက်ဘူးထင်တယ်..ငါတို့သွားကြည့်ချင်တယ်..ရွာခံမုဆိုးနှစ်ယောက်လောက်ထပ်ခေါ်ပြီးအထမ်းသမားလည်းနည်းနည်းငှားပေးပါ..(၃)ယောက်လောက်ပေါ့..
-
ဟေ..နင်တို့ဒီလောက်လူအများကြီးတောထဲအပျော်ထွက်တယ်မှတ်ရော့လား..မုဆိုးကတော့ငါ့သူငယ်ချင်းနဲ့ငါနှစ်ယောက်ပေါ့..နင်တို့လည်းကိုယ့်ဝန်ကိုယ်နိုင်သလောက်ထမ်း..ငါတို့လည်းဝိုင်းသယ်ပေးမယ်..ထမ်းဖို့တော့တယောက်လောက်ဘဲခေါ်သွားမယ်..မြို့ကကောင်တွေအားကြီးပျော့တာဘဲနော့..
-
နားထောင်နေသောကျနော်အတော်အောင့်သီးအောင့်သက်ခံစားလိုက်ရသည်..ဘာဘဲဖြစ်ဖြစ်မနက်ဖြန်တော့သယ်စရာရှိတာကိုယ့်ဖာသာတယောက်တည်းရအောင်သယ်မည်..အပြောတော့မခံချင်..ဆရာတို့ကရွက်ဖျင်တဲများအသင့်ယူလာတာကြောင့်မြေနည်းနည်းညီသောနေရာတွင်ရွက်ဖျင်တဲထိုးပြီးစခန်းချကြသည်..အိမ်သာမေးတော့အနောက်တောတန်းနားကိုမေးငေါ့ပြသည်..ဆာလာအိတ်ကာထားသောအိမ်သာမည်ကာမတ်တတ်တလုံး..အိမ်သာပေါ်တက်လိုက်ပြီးကိစ္စရှင်းတော့ဂီးဂီးကွပ်ကွပ်အသံများကြောင့်အလန့်တကြားပြန်ထမိသည်..အနောက်ကိုကြည့်လိုက်တော့ဝက်တွေ..

အလိုလေး..ဒီရွာမှာသာရက်ရှည်နေရလျှင်မလွယ်..ဟိုနိုင်ငံခြားသားတွေတော့အတွေ့အကြုံသစ်မှာစိတ်ညစ်ရှာရော့မည်..ကျနော်လည်းကြာရင်ဆီးချုပ်ဝမ်းချုပ်ဖြစ်လိမ့်မည်..ကျနော်ကသာစိတ်ညစ်နေတာပါ..ဟိုဂျာမန်သုံးယောက်ကတော့ဘာမှမဖြစ်သလိုအထူးအဆန်းဖြစ်လို့တောင်နေသေး..သူတို့အချင်းချင်းအတွေ့အကြုံတွေပြန်ပြောပြီးတ၀ါးဝါးနဲ့ပွဲကျနေကြသည်..

တောင်ပေါ်ရေကအေးစိမ့်နေတာမို့ရေကြာကြာမချိုးနိုင်..ရေအေးသောက်ဖို့ကရေအရသာကရွှတ်တွတ်တွတ်..ရေကျက်အေးတည်ခိုင်းဖို့ကလည်းမြို့ကကောင်တွေပျော့သည်အပြောကမခံချင်..ဒါပေမယ့်သူတို့ဆီမှာအိမ်နောက်တွင်မီးဖိုပေါ်မှာမဲတူးနေသောရေနွေးအိုးတလုံးကတော့အမြဲတည်ထားတာရှိသည်..တောင်ပေါ်လဘက်ခြောက်ခါးခါးမွှေးမွှေးခတ်ထားသည့်ရေနွေးကတော့အတော်သောက်ကောင်းပါသည်..ပဲပုပ်စေ့လှော်များကတော့ပုလင်းနဲ့ချပေးထားသည်..အိမ်နားမှာတပင်လုံးရဲနေသောမက်မန်းသီးပင်ကိုတွေ့လို့ခူးစားကြည့်တော့ချဉ်သည်..

ညကတော့ရွက်ဖျင်တဲထဲမှာဘဲကိုယ်စီဝင်အိပ်လိုက်ကြသည်..နွေရာသီဆိုသော်လည်းတောင်ပေါ်ညကအေးမြမြ...မနက်ရောက်တော့တောထဲယူသွားဖို့ပစ္စည်းတွေသေချာစွာကျစ်ကျစ်လစ်လစ်ထုတ်ပိုးကြသည်..သေချာပေါက်လိုအပ်မှာတွေကိုဘဲဦးစားပေးသယ်ရသည်..ကျနော်ကတော့လိုမယ်ထင်တာတွေကျောပိုးအိတ်ထဲသေချာသိပ်ထဲ့သည်..မကြည့်တော့နည်းနည်းတော့လေးသည်..ကိစ္စမရှိ..ဒီဝိတ်ကကျနော်သယ်နိုင်သည်..

မုဆိုးတွေကိုကြည့်တော့ဒူးလေးနဲ့မြှားဘူးသာပါသည်..တဘက်ကိုပေါင်းထားပြီးအနွေးထည်တော့ဝတ်ထားသည်..အထမ်းသမားကလည်းဘာမှများများစားစားသယ်ပုံမရ..မရဆိုသူ့မှာဘာမှသယ်လာတာကိုမမြင်..ကျနော်တို့ပစ္စည်းတွေကိုသာလွယ်တန်လွယ်၊ထမ်းတန်ထမ်းလုပ်နေသည်..ကျနော်ကတော့ဂျင်းဘောင်းဘီကိုတောင်တက်ဖိနပ်နဲ့တွဲဝတ်ထားလို့၊ဂျာကင်နဲ့..အကျီ င်္လက်ရှည်နဲ့..ဦးထုတ်ဆောင်းပြီးအကျအန..ဆရာကတော့အစထူထူရှပ်လက်ရှည်ပေါ်ဂျာကင်ဝတ်ပြီးကျနော့်လိုဘဲဂျင်းဘောင်းဘီနဲ့..ဟိုဂျာမန်သုံးယောက်ကတော့အိတ်တွေအများကြီးပါသောဘောင်းဘီပွနှင့်ရှပ်အထူပေါ်မှာသိုးမွေးဆွယ်တာကိုယ်စီနဲ့..သူတို့ကျောပိုးအိတ်တွေကခပ်ရှည်ရှည်ကြီးကြီး..အတော်အသုံးဝင်သည့်အိတ်တွေ..
-
ဆရာလုံရေ..နင့်လူတွေအဆင်သင့်ဖြစ်ရင်စထွက်ရအောင်ဟေ့..နေအပေါ်တက်လာမှဆိုမကောင်းဘူး..
-
ကဲ..နေဇော်ဦးရေ..မင်းဂျာမန်တွေကိုခေါ်လိုက်..ထွက်မယ်လို့..
-
ဟုတ်ကဲ့ဆရာ..
-
ခုတော့လည်းတောတွင်းခရီးတခုစမည်ပေါ့...
------------------------------------------By KK
ဆက်ရန်

Posted in: Stories, ဒီရင်နားပါအရိုင်းလိပ်ပြာ